Երեխայի խնամքը

Ջերմությունն իջեցնող շփոիմներ

Մարմնի բարձր ջերմությունը բազմաթիվ հիվանդությունների ախտանշան է: Հետազոտություններով պարզվել է, որ հակամարմինները, որոնք օգնում են օրգանիզմին հաղթահարելու հիվանդությունը, առավելագույնս են արտադրվում, երբ մարմնի ջերմաստիճանը հասնում է 38,5-39⁰C-ի: Սակայն եթե երեխան նախկինում ջերմության բարձրացման ժամանակ ցնցումներ ունեցել է, անհրաժեշտ է ջերմությունն իջեցնող միջոցներ ձեռնարկել: Այնպես որ, մի շտապեք իջեցնել երկու տարեկանից փոքրերի ջերմությունը, եթե այն 37,5⁰C-ից չի անցնում և ինքնազգացողությունը լավ է, իսկ նրանցից մեծ տարիքի երեխաների, ինչպես նաև չափահասների ջերմությունը պետք է իջեցնել, եթե այն 38,5⁰C-ից բարձր է:

Շփման միջոցով երեխայի ջերմությունն իջեցնելու ժամանակ սենյակի ջերմաստիճանը պետք է լինի 20-23⁰C: Թեթևացրեք նրա հագուստը, երբեմն մերկացրեք նրան, ապա մարմինը շփեք գոլ ջրով կամ բժշկական սպիրտի նոսրացված լուծույթով: Շփելու համար կարելի է օգտագործել նաև օղի:

Մարմնի ջերմաստիճանը կարելի է իջեցնել նաև քացախով շփելու միջոցով: Քացախը սենյակային ջերմաստիճանի ջրով նոսրացրեք (1:1), այդ լուծույթի մեջ անձեռոցիկը թրջեք, թեթևակի քամեք և շփեք երեխայի ձեռքերը, պարանոցը, կուրծքը, որից հետո նրան փաթաթել պետք չէ: Քացախը գոլորշիանալուց հետո ջերմությունն իջնում է: Անհրաժեշտ է, սակայն, հաշվի առնել երեխայի օրգանիզմի առանձնահատկությունները: Ալերգիայի և հոտերի նկատմամբ զգայունության դեպքում խորհուրդ չի տրվում երեխայի մարմինը շփել քացախով, քանի որ մաշկը կարող է գրգռվել ու ցան առաջանալ, հիվանդության պատկերը փոխվի: 

Բարձր ջերմաստիճանի (38,5⁰C և ավելի) դեպքում երեխաների վերջույթները սառն են լինում, ուստի պետք է շփել միայն մարմնի տաք և հատկապես այն հատվածները, որտեղով անցնում են գլխավոր արյունատար անոթները` պարանոցի, աճուկային, անութային փոսերի շրջանները: 

Երեխային սովորականից շատ հեղուկներ` ջուր, թեյ, հյութեր, չոր մրգերից պատրաստված կոմպոտներ տվեք, որը կնպաստի նրա օրգանիզմում կուտակված վնասակար նյութերի հեռացմանը: Կրծքով սնվող երեխաներին ավելի հաճախ մոտեցրեք կրծքին: Կաթնախառնուրդներով կերակրելիս դրանք նոսրացրեք:

Երեխայի քթուղիների չորության դեպքում փորձեք նրա քթանցքներն ամեն օր լվանալ բույսերի (երիցուկ, լորենու ծաղիկներ, եզան լեզու, անանուխ) եփուկով, ապա յուրաքանչյուր քթանցքի մեջ կաթեցրեք 2-3 կաթիլ ձեթ: 

Նորածնային և վաղ մանկական տարիքի երեխաների քթանցքներին կարելի է օրը մի քանի անգամ կաթեցնել ֆիզիոլոգիական լուծույթ, որը կարելի է պատրաստել տնային պայմաններում. 200 գրամ եռացրած` սենյակային ջերմաստիճանի ջրին ավելացրեք մեկ թեյի գդալ կերակրի աղ: Ջեռուցվող սենյակում օդը խոնավացնելու նպատակով կարելի է երեխայի գլխավերևում խոնավ սրբիչ կամ սավան փռել:

Կոկորդի ողողում

Կոկորդը և բերանի խոռոչը երեխաները կարող են ողողել 3-4 տարեկանից հետո: Նրանց կարելի է կոկորդը ողողել սովորեցնել միայն սեփական օրինակով, պետք է ցույց տալ, թե ինչպես է դա կատարվում, ասել, որ հարկավոր է բերանը ջուր լցնել, կուլ չտալով ու գլուխը հետ թեքելով` արտասանել ՙղ-ղ-ղ՚ հնչյունը: Կոկորդի ողողման համար օգտագործվող լուծույթը պետք է լինի գոլից քիչ տաք: Բորբոքային երևույթների դեպքում արդյունավետ է կերակրի աղի, սոդայի և յոդի խառնուրդը. մեկ բաժակ ջրին ավելացրեք 4 կաթիլ յոդ, կեսական թեյի գդալ կերակրի աղ ու սոդա: Նշիկաբորբի, վերին շնչուղիների բորբոքման, բերանի խոռոչի հիվանդությունների` ստոմատիտի, լնդախտի դեպքում հաճախ ողողման համար օգտագործվում են դեղաբույսերի` երիցուկի, եղեսպակի, տատրակի, հիպերիկոնի թուրմեր. մեկ ճաշի գդալ դեղաբույսի վրա ավելացրեք 200 գրամ եռացրած, սենյակային ջերմաստիճանի ջուր, ապա շոգեբաղնիքի վրա եռացրեք 5 րոպե, 40-50 րոպե թրմեք և քամեք: Յուրաքանչյուր դեղաբույսի թուրմը կարելի Է տալ և' առանձին, և' մյուսների հետ խառնած, բայց այնպես, որ ստացվի մեկ բաժակ ջրին մեկ ճաշի գդալ խառնուրդ: Թուրմը կարելի Է խմեցնել 2-3 թեյի գդալ, յուրաքանչյուր 2-3 ժամը մեկ, անհրաժեշտության դեպքում` ավելացնելով մեղր: Ավելի փոքրահասակ երեխաները կոկորդի ողողում կատարել չեն կարող: Նրանք պետք է խմեն առատ տաք հեղուկներ: 

Հարցեր, պատասխաններ, մեկնաբանություններ